7 Dekabr 2016 / 10:35
Türkiyə Təhlükəsizlik Ümumi Müdirliyi Fəthullahçı Terror Təşkilatı ( FETÖ) haqqındakı hesabatını yeniləyib.
Publika.az “Sabah” nəşrinə istinadən xəbər verir ki, 2016-cı il 9 sentyabr tarixli 56 səhifəlik hesabat terror cinayətlərinə baxan Yargıtay 16-cı Cəza Dairəsinə göndərilib.
Hesabatda diqqət çəkən detallardan biri təşkilatın Türkiyəni “fəaliyyət bölgələri” olaraq 9 hissəyə bölməsidir. FETÖ bölgələrə sirri bilinməyən aşağıdakı kod adları verib.
1. AH: İstanbul, Kırklareli, Ədirnə.
2. FT: Bursa, Çanaqqala, Balıkesir, Kütahya, Bilecik.
3. HL: Manisa, İzmir, Aydın, Muğla, Antalya, Afyonkarahisar, Uşak, Dənizli.
4. SLÇ: Ankara, Eskişehir, Kırıkkale, Bolu, Çankırı.
5. SLM: Adana, Hatay, Mersin.
6. TR: Konya, Karaman, İsparta.
7. KN: Kayseri, Niğde, Aksaray, Nevşehir, Kırşehir, Yozgat.
8. SD: Malatya, Elazığ, Bingöl, Tunceli.
9. AKF: Trabzon, Ordu, Giresun, Gümüşhane, Bayburt, Rize, Artvin.
Hesabatda təşkilatın maliyyə qaynaqlarından danışılır. Hesabata görə, FETÖ iş adamlarından təhdid və şantajlarla pullar alıb, təşkilat üzvlərinin maaşlarının 10 faizini “himmət” adı altında ələ keçirib.
Ömər Dağlı,
PUBLİKA.AZ & VƏTƏNSEVƏRLƏR
7 Dekabr 2016 / 15:30
Türkiyəli politoloqla müsahibə
Türkiyənin Avropa İttifaqı ilə münasibətlərinin pisləşməsi və Şanxay Əməkdaşlıq Təşkilatına (ŞƏT) üzv olmaq istəyinin ortaya çıxmasından sonra Qərblə Şərq arasında güc balansının dəyişə biləcəyi məsələsi gündəmə gəlib. Əgər Türkiyə ŞƏT-ə üz olarsa, bu gücün Qərbdən Şərqə keçməsinə səbəb ola bilər. Lakin bu proseslərdə Türkiyənin də itirəcəyi şeylər az deyil. İndi Türkiyənin hansı yolu tutacağı, hansı siyasət izləyəcəyinə dair açıq qalan suallar var.
Ankarada fəaliyyət göstərən Qafqaz Strateji Araşdırmalar Mərkəzinin (KAFKASSAM) rəhbəri, politoloq Hasan Oktay Publika.az-a müsahibəsində bu suallara cavab verib.
- Türkiyə Şanxay Əməkdaşlıq Təşkilatına üzv olarsa, bu, onun üçün təhlükəli ola bilərmi?
- Türkiyə 15 iyul hadisələrindən sonra çox ciddi fikir qarışıqlığı ilə qarşı-qarşıyadır. AKP hökuməti 2002-ci ildə ABŞ-Avropa Birliyi-FETÖ ilə qurduğu koalisiyanı pozandan sonra ölkə böhranlarla üzləşdi. Problem Türkiyə yox, hökumətin yanlış siyasətidir. İndi ABŞ və Avropa Birliyi AKP-ni FETÖ ilə dayandırmaq istəyir. Lakin bunu edərkən tarixi səhvə yol verdi və 15 iyulda xalqın etirazını hesablaya bilmədi. Türk milləti ölkəsinə sahib çıxaraq oyunu pozdu. Hərbi qiyam cəhdi millət tərəfindən yatırılandan sonra AKP xalqın yanına qayıtdı. Əslində, AKP 3 noyabr 2002-15 iyul 2016 tarixində etdiyi səhvlərin cəzasını çəkir. Eyni zamanda, AKP üzərində bu cəzanı türk xalqına da vermək istəyirlər. Məhz burada Türkiyənin Avropa İttifaqından üz döndərərək, Şanxay Əməkdaşlıq Təşkilatına daxil olması gündəmə gəlir. AKP və ABŞ-Aİ-FETÖ arasındakı mübarizə Türkiyə dövlətinin uzunmüddətli strategiyasını dəyişdirə bilməz. Türkiyə 150 ildir Qərb ittifaqı ilə hərəkət edərək, qərbləşməni bir mədəniyyət layihəsi olaraq görür və tarazlaşdırılmış siyasət aparır. Bu baxımdan, AKP və ABŞ-Aİ-FETÖ mübarizəsi müvəqqətidir. Bu, Türkiyə üzərində aparılan qarşıdurmadır. AKP türk xalqına və Türkiyəyə söykəndiyi müddətdə həmişə ayaqda qalacaq. Türkiyə 150 illik qərbləşmə hədəflərindən bir anda vaz keçməz, vaz keçməyəcək də. Bu baxımdan, Şanxay Əməkdaşlıq Təşkilatına görə Avropa İttifaqına üz çevirməyəcək. Hesab edirəm ki, hazırda heç bir təhlükə yoxdur.
- Türkiyənin Şərqə doğru üz tutması NATO-dan ayrılması ilə nəticələnə bilərmi?
- Biz NATO-dan çıxmağı yox, NATO-ya bir türkün baş katiblik etməsini istəyirik. ABŞ-Aİ son illərdə AKP ilə apardığı mübarizəni Türkiyə ilə mübarizəyə çevirərək, səhvlərə yol verir. Fikrimcə, qısa zamanda bu xəstəlikdən vaz keçəcəklər. Avropa İttifaqı son dövrlər Türkiyəyə qarşı mövqeyini dəyişdirdi və sərtləşdirdi. Hazırda siyasi tarazlıqlar pozulur, iqtisadiyyatlar alt-üst olur və ölkələr bir-birinə qarşı açıq hücuma keçməkdən çəkinmirlər. Suriya böhranı III Dünya müharibəsinə səbəb olmadı, amma bir çox dövlət bu müharibənin kandarına qədər gəlib çıxdı. Türkiyə sərhədləri yaxınlığında baş verən hadisələrə müdaxilə edib-etməmək arasında tərəddüd edir. Bir tərəfdən İŞİD-ə qarşı mübarizə üçün ordu Suriyaya daxil olur, digər tərəfdən Əsədə müharibə elan ediləcəyi bildirilir. Türkiyə ABŞ və Aİ istədiyi üçün Suriya məsələsinə bu qədər müdaxilə etdi. Sonra gördü ki, gedişat təhlükəlidir. ABŞ-Aİ Ərdoğana qarşı böyük bir oyun oynadı, lakin sonda məğlub oldu. İndi təşviş içində hərəkət edirlər. Amma qısa zamanda hadisələr normallaşacaq. Türkiyə ona qarşı edilənləri unutmayacaq, amma münasibətlərin də davam etməsi üçün lazımı addımlar atır. Türkiyə heç bir ittifaqa məcbur və məhkum deyil, lakin regional proseslər Türkiyənin Qərb ittifaqında qalmasını göstərir. Bu ittifaqdan çıxıb-çıxmamağa Türkiyə özü qərar verəcək. Demokratik dəyərlər, insan haqları, hüququn üstünlüyü bəşəri dəyərlərdir. Bu dəyərlərə əməl edən ölkə qazanar. Türkiyə də NATO-dan çıxmayacaq, əksinə NATO-nun baş katibinin türk olması haqqını müdafiə edəcək. Türkiyə Avropa İttifaqı ilə də əlaqələri kəsməyəcək. Lakin Avropa İttifaqı bir tərəfdən Türkiyə ilə müzakirələri davam etdirir, digər tərəfdən terror təşkilatı olan PKK ilə müxtəlif platformalarda görüşlər keçirir. PKK rahat şəkildə Avropa İttifaqı ölkələrində fəaliyyət göstərir. Avropa İttifaqı bunu demokratik azadlıq adı altında edə bilər, amma nəticə olaraq Türkiyənin etibarını itirir. Türkiyə də Avropa İttifaqına qarşı haqlı olaraq etiraz edir.
- Türkiyə ŞƏT-lə yaxınlaşarsa, Rusiya və Çinin tərkibindəki türklərə dəstəyini necə verəcək, yaxud bunu kəsəcəkmi?
- Türkiyə beynəlxalq münasibətlərdə qaydalara ən çox diqqət edən ölkələrdən biridir. Ölkələrin ərazi bütövlüyünü müdafiə edir. Bunun bariz nümunəsi Azərbaycandır. Qarabağ məsələsi Türkiyənin ən həssas olduğu mövzudur və Azərbaycanın ərazi bütövlüyünü dəstəkləyir. Türkiyənhin Rusiya və Çin coğrafiyasında yaşayan türklərlə maraqlanması isə həmin ölkələrin hüquqi və ərazi bütövlüyü çərçivəsindədir. Türkiyə bu çərçivənin kənarına çıxmır. Hər ölkənin qanunu, bayrağı, ərazi bütövlüyü o coğrafiyada yaşayan türklər üçün də əsasdır. Bu, vacib mövqedir. Bu baxımdan, həm Çin, həm də Rusiya Türkiyədən narahat olmamalıdır. Türkiyə Şanxay Əməkdaşlıq Təşkilatı ilə sağlam münasibətlər qura və Qərb dəyərlərini bu təşkilata da transfer edə bilər. Eyni zamanda, bu təşkilata daxil olan ölkələrin məhsulları da Türkiyə üzərindən Avropaya daşına bilər. Türkiyə burada ən yaxşı körpüdür.
- Yəni Türkiyə iki cəbhə arasında balans siyasəti aparacaq?
- Türkiyə Avropa İttifaqı ilə müzakirələrdən və qərbləşmə layihələrindən vaz keçməyəcək, lakin regional ittifaqlarla da münasibətlərini davam etdirəcək. Türkiyənin Şanxay Əməkdaşlıq Təşkilatı ilə münasibətlər qurmaq istəyi bütün diqqətin üzərinə yönəlməsinə səbəb oldu. Türkiyə ittifaqların axtardığı üzv ölkə dəyərindədir. Çox vaxt böhranlar yeni dönəmin başlanmasına səbəb olur. ŞƏT ilə Aİ arasında seçim yox, körpü rolunu oynaya bilmək potensialına sahib olan Türkiyə Avropa standartlarını ŞƏT-ə, ŞƏT-in potensialını da Avropaya transfer edə bilər. Eyni formada Rusiya-NATO qarşıdurmasında da vasitəçi ola bilər. Yəni Türkiyə mövcud böhranın həll açarı ola biləcək potensiala sahibdir. Vacib olan bu böhranı həll edərək regional güclərin arasında yerini ala bilməkdir. ŞƏT inkişaf etməkdə olan bir ittifaq olsa da, Aİ-nin standartlarından çox uzaqdır. İnsan haqları, hüququn üstünlüyü kimi bəşəri dəyərlər məsələsində ŞƏT çox zəifdir. Bu baxımdan, Türkiyə bəşəri dəyərləri bura transfer edə bilər. Fikrimcə, Türkiyə Aİ ilə müzakirələri davam etməlidir. Yəni böhrandan qaçmaq yox, onu həll etmək lazımdır. Türkiyənin 50 illik Aİ siyasətindən bir andan vaz keçməsi mümkünsüz görünür. Ola bilsin ki, yeni addımlarla müzakirələrdə əlini gücləndirmək və istədiyinə nail olmaq istəyir. Lakin Aİ ilə Türkiyənin 50 illik münasibətləri 15 iyul hadisələrinin təsiri ilə bir qələmdə silinib atıla bilməz. Bu baxımdan, Aİ və Türkiyə münasibətlərini yenidən gözdən keçirməli və sağlam əlaqələr qurmalıdır.
- Türkiyə Qərb və Şərq arasındakı tərəzidə tarazlığı saxlayan güc rolundadır. İndiyə qədər Qərb ittifaqlarında olması tərəzinin bu gözünün ağır olmasına səbəb idi. İndiki situasiya bir qədər fərqlidir. Bu tərəzinin gözü Qərbdən Şərqə doğru dəyişə bilərmi?
- Türkiyə tarazlıq nöqtəsindədir. Hansı cəbhəyə keçərsə, həmin cəbhənin aktivləşməsi mümkündür. Lakin burada əsas olan qarşıdurmaların qarşısını almaqdır. III Dünya müharibəsinə doğru getdiyimiz bir vaxtda, ağıllı davranan mərkəzlərə ehtiyac var. Türkiyə bəlkə də ilk dəfə Qərblə Şərq arasında keçid ölkəsi olmaqla yanaşı, həm də tarazlayıcı faktordur. Belə vəziyyətlərdə Türkiyə yaxşı siyasət aparmalıdır. 15 iyulda AKP hökuməti böyük bir şok yaşadı və hələ də bunun təsirindədir. Buna görə də aparılan siyasət bir qədər qarışıqdır. Əgər iqtisadi böhran sürətlənərsə, qısa zamanda ciddi problemlər ortaya çıxa bilər. Lakin MHP və onun lideri Dövlət Baxçalı yerində müdaxilə edərək, Türkiyəni fırtınalı dənizdən sakit limana doğru çəkir. Bu günlərdə həmişə olduğundan daha çox soyuqqanlı şəxslərə ehtiyac var.
Asif Nərimanlı,
PUBLİKA.AZ & VƏTƏNSEVƏRLƏR
06.12.2016 / saat 10:28
Əziz dostlar! Hörmətli həmkarlar!
Dünən - 05.12.2016 -cı il tarixində Rusiya Dövlət Dumasının Müdafiə Komitəsinin sədri, Rusiya Hava Desant Qüvvələrinin keçmiş komandanı, Rusiyanın Qəhrəmanı, general-polkovnik Vladimir Şamanovun çox maraqlı bir açıqlaması ilə tanış oldum. Keçmiş SSRİ Silahlı Qüvvələrinin sıralarında xidmət keçmiş hərbçilər arasında kifayət qədər tanınan rus generalı, hazırda Dövlət Dumasının ən önəmli komitələrindən birinin rəhbəri kimi o regionla, Azərbaycanla bağlı bir sıra maraqlı məqamlara toxunub. Məhz ona görə də, onun bəzi açıqlamaları ilə bağlı öz fikirlərimi sizlərlə bölüşmək istərdim.
General Şamanovun deməsinə görə, “Rusiya-Ermənistan birləşmiş qoşun qruplaşmasının yaradılması Azərbaycana qarşı deyil və ola da bilməz. O bildirib ki, birləşmiş qoşun qruplaşmasının yaradılması sırf müdafiə məqsədi daşıyır: “Bu, Rusiyanın cənub sərhədlərini qorumaq üçün yaradılıb. Sovet İttifaqı dövründə Bakı Hava Hücumundan Müdafiə Dairəsi vardı və SSRİ-nin cənub sərhədlərini qoruyurdu. Ermənistan Rusiyanın Kollektiv Təhlükəsizlik Müqaviləsi Təşkilatındakı müttəfiqidir. Ona görə də Rusiya bu ölkə ilə hava hücumundan müdafiə sistemini birləşdirib”. Ehtiyatda olan general-polkovnik Rusiya-Ermənistan birləşmiş qoşun qruplaşmasının yalnız hava hücumundan müdafiə qoşunlarından ibarət olduğunu da bildirib: “Burada söhbət quru qoşunlarından deyil, hava hücumundan müdafiə qoşunlarından gedir. Bu saziş sırf müdafiə xarakteri daşıyır. Ona görə də Rusiya Dövlət Duması və Müdafiə Komitəsi tərəfindən dəstəklənib. Bu, heç bir halda bizim qardaş ölkə Azərbaycana qarşı ola bilməz”.
Hörmətli rus generalının dedikləri ola bilsin mülki, hərbi sahədən bir qədər uzaq olan dostlarımız üçün normal, cəlbedici görünsün. Hətta, belə açıqlamadan sonra, rusiyapərəst, Azərbaycanın nə yolla olursa-olsun rəsmi Moskvanın orbitinə keçməsini arzulayan şəxslər üçün bir təbliğat vasitəsi üçün işarə rolu da oynaya bilər. Amma, həmən yoldaşlara müraciət edirəm ki, siz rus generalının açıqlamasını DİQQƏTLƏ OXUYUN və incələyin. O çox qeyri-səmimi və realıqdan uzaq fikirlər söyləyir. Əvvala, Rusiya Federasiyasının 2049-cu ilədək Ermənistanda yerləşəcək 102-ci Bazası ən müasir silah və texnika ilə hərtərəfli təhciz olunub və bu proses durmadan davam etdirilir. Rusiya və önun Cənubi Qafqazda ən sadiq və birmənalı vassalı olan Ermənistan üçün hansı təhlükə mövcuddur ki, onlar əlavə birləşmə yaradılması haqqında qərar qəbul edirlər? Özü də bu birləşmənin komandanı kimi isə qatı millətçi, erməni generalı, Ermənistan Silahlı Qüvvələrinin 5-ci Ordu Birləşməsinin komandiri general-mayor Arkadiy Makaryanı təyin ediblər. Özü də, RF Dövlət Dumasının önəmli şəxslərindən biri, prezident Vladimir Putinin ən sevimli və etibar etdiyi desant generalı V. Şamanovun özü də gözəl bilir ki, o sadəcə Azərbaycan xalqını aldatmaq və "başımızın altına yastıq" qoymaq üçün bu fikirləri səsləndirib. Açıqlamasının sonunda, o "bu, heç bir halda bizim qardaş ölkə Azərbaycana qarşı ola bilməz” ifadəsini işlədir. Fikir verdinizsə, rus general bizə "qardaş" kəlməsi ilə müraciət edir.
Ay yoldaş, İvan, ay yoldaş tovariş, sən necə qardaşsan ki, 20 ildən çoxdur sənin "qardaşının Qarabağdakı evini-eşiyini, yurdunu-yuvasını, sənin ƏSL din və iman qardaşların Ermənistan məhz sənin İŞTRAKINLA viran qoyub, sən bu günə kimi bir dəfə də olsun dillənməmisən, səsin çıxmayıb, indi nə baş verirb ki, sən Azərbaycandakı "qardaşlarını" yada salmısan? Yeni partiya, özü də dəyəri milyonlarla olan silah-sursat satmaq haqqında son vaxtlar dolaşan söhbətlərin fonunda sizin "qardaşınızı" yada salmağınız da çox riyakar və qeyri-səmimi hərəkətdir. Keçmiş SSRİ zamanında, hərbçilər, adətən öz əsəblərini, hirslərini bir-birinə izhar etmək üçün, məhz üç məhşur sözdən ibarət cümlələrdən istifadə edirdilər. Şəxsən bütün gördüklərimizin və yaşadıqlarımızın fonunda Sizin ünvanınıza indi məhz o məşhur, amma mətbuatda yazılması qeyri-etik çıxan sözləri demək istərdim. Öz payınızı nəhayət ki, götürsəniz, pis olmazdı. Azərbaycan xalqının humanistliyindən yetərincə istifadə etdiniz, bəsdir. Adam, kişi olar. Özü də, əgər çiynində general paqonu daşıyırsa, onda daha ciddi və əsl Kİşi olmağa borcludur.
Tanrı Azərbaycanımızı geydirmə "qardaşlardan" qorusun !
& VƏTƏNSEVƏRLƏR
2 Dekabr 2016 / 11:55
Serj Sarkisyanın Azərbaycanın ünvanına hədə dolu bəyanat səsləndirməsi özünü və hakimiyyətini rəsmən ifşa etməsi deməkdir. Bu gün Azərbaycan yalnız ərazisi üzərində suverenliyini bərpa etməsi məsələsini qaldırırsa, Ermənistan qonşu dövlətin paytaxtını tuta biləcəyini bəyan edir. Bu, orta əsrlər dövrünə, hətta ondan öncəki dövrə məxsus mağara təfəkkürüdür. Bu, Ermənistanın artıq açıq-aşkar dünyanın qəbul edilmiş hüquq normalarını və qaydalarını inkar etmək etməsi deməkdir. Bu adam üçün artıq sivil dünya, beynəlxalq hüquq normaları, BMT-nin nizamnaməsi və qərarları anlayışları yoxdur. İndi görün Azərbaycan prezidenti Ermənistanı idarə edən bu cür insanla üzbəüz qalıb onunla Qarabağ probleminin həllinə dair danışıqlar aparmalıdır.
Bunu Milli.Az-a açıqlamasında Milli Məclisin Müdafiə, təhlükəsizlik və korrupsiya ilə mübarizə komitəsi sədrinin müavini, YAP İcra Katibliyinin Siyasi təhlil və proqnozlaşdırma şöbəsinin müdiri Aydın Mirzəzadə deyib.
Millət vəkili qeyd edib ki, digər tərəfdən, Sarkisyanın hədə-qorxu bəyanatını həyata keçirə bilməyəcəyini əslində Ermənistan ictimaiyyəti özü çox yaxşı bilir: "Aprel ayında Ermənistan ordusu Azərbaycan Silahlı Qüvvələri ilə qarşıdurmada açıq-aşkar məğlubiyyətə uğradı və iki min hektar mürəkkəb coğrafiyası olan ərazi işğalçılardan azad edildi. Ermənistan ordusunda böyük təşviş var idi və ali baş komandan olan Serj Sarkisyanın özü həmin günlərdə Azərbaycanla danışıqlara hazır olmasına dair bəyanatlar verir və beynəlxalq birliyi hərbi əməliyyatları dayandırmaq üçün vasitəçi olmağa çağırırdı. Bu gün isə onun hərbi ritorika ilə çıxış etməsi gələn il Ermənistanda keçiriləcək parlament seçkiləri ilə bağlıdır. Bu gün Ermənistan hakimiyyəti seçkilərdə seçici qarşısına hər hansı bir uğuru ilə çıxa bilmir. İnsanların həyat şəraitinin aşağı düşməsi, gələcəyə inamın olmaması, müstəqilliyini digər dövlətlərə satması kimi məsələlər seçicidə başqa bir alternativ axtarmaq meyli yaradır. O baxımdan baş nazir dəyişildi, indi isə diqqəti daxili məsələlərdən hərbi ritorika ilə Qarabağ məsələsinə yönəltməyə çalışır. Bu yaxınlarda hökumət əhaliyə satılan təbii qazın qiymətini aşağı saldı. Halbuki bu, Ermənistan büdcəsinə böyük zərbə vurur. Seçkidən sonra isə həmin qiymətlər yenidən asanlıqla qaldırılacaq".
A.Mirzəzadə hesab edir ki, Sarkisyan bu cür bəyanatlarla nə Azərbaycanı qorxuda, nə də beynəlxalq ictimaiyyəti aldada biləcək: "Azərbaycan öz ərazi bütövlüyünü təmin etmək əzmindədir və öz Silahlı Qüvvələrini daim gücləndirir. Ölkəmizin hər bir vətəndaşı torpaq uğrunda mübarizə aparmağa, döyüşməyə və hətta ölməyə hazırdır. Əgər Ermənistan danışıqlarda qeyri-konstruktuv mövqe göstərəcəksə, onu növbəti "aprel hadisələri", özü da daha ağır formasında gözləyir".
Qeyd edək ki, Ermənistan prezidenti Serj Sarkisyan noyabrın 26-da İrəvanda Respublika Partiyasının 16-cı qurultayında danışıqlar prosesini sual altına qoyan, eləcə də Azərbaycanın ünvanına hədələrlə dolu bəyanatla çıxış edib: "Biz qarşımıza Bakını tutmaq və onu kapitulyasiyaya məcbur etmək kimi hərbi-siyasi məqsəd qoymamışıq, amma eyni zamanda yaxşı anlayırıq ki, düşmənə sarsıdıcı zərbə vura bilərik: fikrimcə, əlavə detallara ehtiyac yoxdur".
Erməni "fürer" bununla kifayətlənməyərək aprel hadisələrinə görə Azərbaycanı ittiham edib, eləcə də rəsmi Bakının mövcud vəziyyəti və qüvvələr balansını real qiymətləndirmədiyini deyib. Onun fikrincə, Qarabağ problemi yalnız Qarabağ xalqının (?) öz müqəddəratını azad təyin etməsi (?) yolu ilə həll edilə bilər, bütün digər məsələlər isə buna paralel olaraq həllini tapacaq.
İlkin İzzət,
MİLLİ.AZ & VƏTƏNSEVƏRLƏR
GÜNÜN SİYASİ XÜLASƏSİ
7 rayon üçün ŞƏRT...
Ermənistan prezidentinin mətbuat xidmətinin rəhbəri işğal olunmuş ərazilərinin qaytarılmasından və Qarabağın statusunun müəyyənləşdirilməsindən danışıb. Rusiya tərəfindən ilhaq edilən Krım ətrafında gərginlik son həddə çatıb. Kiyev Krım yarımadasına yaxın ərazilərdə raket təlimlərinin startını elan edib. “Reuters” agentliyi Rusiya tərəfindən dəstəklənən və Dəməşq tərəfində vuruşan hərbi ittifaqdakı yüksək vəzifəli məmura istinadən Moskvanın Hələb planını açıqlayıb.
Ermənistan prezidentinin mətbuat xidmətinin rəhbəri Vladimir Akopyan Azərbaycanın işğal olunmuş ərazilərinin qaytarılmasının müzakirə mövzusu olmadığını bildirib.
O, “Azadlıq” radiosunun erməni xidmətinə açıqlamasında deyib ki, hansısa ərazinin qaytarılması məsələsi Qarabağın statusunun müəyyənləşdirilməsi halında müzakirə oluna bilər.
Ermənistan prezidenti Serj Sarkisyan “Rusiya bu gün” agentliyinə müsahibəsində qeyd etmişdi ki, Qarabağın statusunun müəyyən edilməsi şərti ilə yeddi rayonun qaytarılmasını nəzərdə tutan sənəd mövcud olub, lakin Bakı bununla razılaşmayıb.
Ermənistanın “lragir” saytı da V.Akopyanın bu açıqlamasının şübhəli olduğunu yazıb. ABŞ-ın xarici siyasət üzrə Məsləhət Şurasının əməkdaşı, məşhur ekspert Stiven Blankın “cacianalyst” saytında dərc olunan məqaləsində irəli sürdüyü fikirlər də diqqət çəkir.
Azərbaycan Xarici İşlər Nazirliyinin rəhbəri Elmar Məmmədyarov bildirib ki, Ermənistan Dağlıq Qarabağ münaqişəsinin nizamlanması üzrə danışıqlardan yayınır.
E.Məmmədyarov əlavə edib ki, rəsmi Yerevan Fransa tərəfinin Hamburqda "3+2" formatında görüş keçirilməsi təklifinə hələ də cavab verməyib: "Bu isə o deməkdir ki, Ermənistan danışıqlardan yayınır, sülh prosesinə dəstək vermir".
Ermənistan tərəfinin Dağlıq Qarabağın ya müstəqil olması, ya da Ermənistana birləşdirilməsi barədə bəyanatına münasibət bildirən Azərbaycan XİN rəhbəri bildirib ki, bu cür bəyanat danışıqlar prosesinə mənfi təsir göstərir.
Ermənistanın “Qraparak” qəzeti ölkənin Respublika Partiyasındakı mənbəyə istinadən Azərbaycan və Ermənistan prezidentləri arasında olan dialoqlardan birini açıqlayıb. Dialoq Dağlıq Qarabağda referendum keçirilməsi ilə bağlıdır.
“Keçmişdə Qarabağdakı, Əfqanıstandakı, Balkanlardakı, Krımdakı, Kiprdəki zülmlərə qarşı necə çıxmışıqsa, indi də Suriyada, İraqda və digər bölgələrdə zülmlərə icazə verməyəcəyik”. Bunu Türkiyə prezidenti Rəcəb Tayyip Ərdoğan deyib. O, Hələbin bombalanmasına, insanların öldürülməsinə sərt reaksiya verib. “Hələbə düşən bombalara görə göz yaşı tökən hər uşaq, övladına sarılan hər ana-baba bizim qardaşımızdır”, - deyə o diqqətə çatdırıb.
Türkiyənin xarici işlər naziri Mövlud Çavuşoğlu şənbə günü Azərbaycana işgüzar səfər edəcək. Səfər çərçivəsində Azərbaycanın rəsmi şəxsləri ilə görüşlər planlaşdırılıb. Danışıqlar zamanı regiondakı hadisələr, xüsusilə Dağlıq Qarabağ münaqişəsi müzakirə olunacaq.
SEPAH generalı Ərdoğanı təhdid edib
İran İslam İnqilabı Keşikçiləri Korpusunun (SEPAH) rəis müavini, general Rəsul Senayirad bildirib ki, Türkiyə prezidenti Rəcəb Tayyib Ərdoğanın Bəşər Əsəd hökumətini devirməyə gücü çatmaz.
İranlı general deyib ki, əgər Türkiyənin belə gücü olsaydı, o zaman Suriya və İraqla sərhəddə “bufer zona” yaratmağa nail olardı: “Ancaq Türkiyə bunu bacara bilmədi. Ona görə də Türkiyə hakimiyyətinin Bəşər Əsədə qarşı müharibəsi yalnız quru sözdən ibarət ola bilər”.
Rəsul Senayirad iddia edib ki, Türkiyə və İordaniya Suriyada Bəşərə Əsədə qarşı olan qüvvələrə logistik dəstək verir: "Bu dəstəyin arxasında isə Türkiyə ilə yanaşı, Səudiyyə Ərəbistanı, Qətər və Birləşmiş Ərəb Əmirlikləri dayanır”.
Türkiyəyə səfər edən Rusiya xarici işlər naziri Sergey Lavrovun Suriyada türk əsgərlərinin vurulması ilə bağlı sözləri qalmaqala səbəb olub.
Türkiyə mediası Türkiyə xarici işlər naziri Mövlud Çavuşoğlu ilə görüşən S. Lavrovun “Türk əsgərlərini Suriya ordusu vurdu” dediyini bildirsə də sonradan bunun tərcümə səhvi olduğu ortaya çıxıb. Lavrovun “Əl-Bab hücumunu (türk əsgərlərinə hücum-red) nə Rusiya, nə də Suriya edib” dediyi məlum olub.
ABŞ-ın keçmiş dövlət katibi Madlen Olbrayt Vaşinqtonun Yaxın Şərqə rəhbərlik etmək siyasətindən imtina etməli olduğunu deyib. Xanım diplomatın fikrincə, artıq bu, Vaşinqton üçün problemlər yaradır: “ABŞ uzun illərdir Yaxın Şərqə daxil olub. Bizi burada yerlilər dinləmirlər. Yaxın Şərqdəki problemi xaricdəki gücün həll etməsi mümkün deyil. Bu bölgə yalnız özü-özünü düzəldə bilər. Yaxın Şərqdəki böhranların sona çatması üçün daxili savaşlara son verilməlidir. Təbii ki, biz buradan bir gecə içində çıxa bilmərik. Yaxın Şərqdə çox dinamik bir əhali var və biz onları görmürük”.
Rusiya prezidentinin Federasiya Şurasına müraciəti
Bu gün Rusiya prezidenti Vladimr Putin Federasiya Şurasına müraciət edib. Bir sıra radio və televiziya kanalları vasitərilə birbaşa translyasiya edilən ənənəvi müraciətdə prezident daha çox iqtisadiyyat, sosial məsələlər və daxili siyasətə toxunub.
Vladirmi Putin Rusiyanın xarici siyasətinin yeni konsepsiyasını təsdiq edib.
Rusiya Dumasında çıxışı zamanı Liberal Demokrat Partiyasının sədri Vladimir Jirinovski söyləyib ki, Rusiyada hakimiyyət tezliklə dəyişəcək.
“Mən əminəm ki, 30-cu ilə qədər hakimiyyətə gələcəyik. Bu, son tarixdir. Bu zalda oturanların əksəriyyəti, Kreml Liberal Demokrat Partiyasının olacaq. Bu, ancaq 5 il belə olacaq. Rusiya gərək mütəmadi seçkilərin keçirildiyi ölkələri dəstəkləsin. Ölkənin 60 il bir insana köklənməsinə ehtiyac yoxdur. Bizə lider sərkərdələr lazım deyil. Mən əminəm ki, hamımız 30-cu ilə qədər siyasi elitanın normal dəyişilməsini görəcəyik. Tezliklə, Kuba və Şimali Koreyada kommunist rejimlər də yox olacaq. Bu ölkələrdə kommunist rejimlərin qurulması bizim günahımızdır. Kommunistlər bir daha heç yerdə hakimiyyətə gəlməyəcəklər”, - deyə partiya sədri bildirib.
ABŞ Nümayəndələr Palatası Rusiyanın dünyaya siyasi müdaxiləsinə qarşı komissiyanın yaradılması üçün qanun layihəsini qəbul edib. Qanun layihəsinin lehinə 390 konqresmen səs verib. Rusiyanı müdafiə edənlərin sayı isə cəmi 30 nəfər olub. Qanun layihəsinin ilin sonuna qədər Senatda müzakirəsi gözlənilir.
Bu sənədə əsasən, ABŞ Rusiyanın müxtəlif dünya ölkələrinin siyasətinə mənfi təsirini aradan qaldırmaq üçün xüsusi qrup yaradacaq. Qrupun tərkibinə Dövlət Departamentinin, Federal Təhqiqatlar Bürosunun, Ədliyyə Nazirliyinin, Maliyyə Nazirliyinin, Energetika Nazirliyinin nümayəndələri daxil olacaq.
Krımda təhlükəli qarşıdurma - Kiyev raket atışlarına başladı
Rusiya tərəfindən ilhaq edilən Krım ətrafında gərginlik son həddə çatıb. Kiyev Krım yarımadasına yaxın ərazilərdə raket təlimlərinin startını elan edib. Raket atışları Krımın hava məkanının ən azı 30 kilometrliyində keçirilir.
Bu haqda Ukrayna Hərbi Hava Qüvvələrinin “Cənub” hava komandanlığının mətbuat mərkəzinin rəhbəri Vladimir Krıjanovskiy bildirib.
Ukraynanın elan etdiyi raket təlimləri ilə əlaqədar olaraq dünən Krımda Rusiyanın Hava Hücumundan Müdafiə qoşunları gücləndirilmiş iş rejiminə keçirilib. Krımın güc strukturlarındakı mənbə bildirib ki, Qara dəniz donanmasının gəmiləri yarımadanın qərb sahili yaxınlığında mövqe tutublar.
Rusiya prezidenti Vladimir Putin 55 min əsgərin Ukrayna sərhədinə göndərilməsi əmrini verib.
Rusiya Ukraynanın Krım yaxınlığında raket təlimlərinə başlamasına cavab olaraq, sərhəddə böyük hərbi təlim keçirəcək.
Məlumata görə, Ukrayna sərhədinə göndərilən əsgərlərin əksəriyyəti Krıma yerləşdirilir. Kreml eyni zamanda, krımın Qərb sahillərinə hərbi gəmilər göndərib. Rusiya hərbi mənbələri Qara dəniz donanmasına “müharibəyə hər an hazır olun” əmrinin verildiyini deyir.
“Putin bununla Üçüncü dünya müharibəsinə başlayacaq” – ŞOK PROQNOZ
“Rusiya tərəfindən Ukraynaya raket zərbəsi endiriləcəyi halda Üçüncü dünya müharibəsi başlanacaq”. Bunu Ukrayna Ali Radasının deputatı Yuri Bereza “Ukrayna 112” telekanalına müsahibəsində deyib.
“Bu, (Rusiyanın Ukraynaya raket zərbəsi endirməsi –red.)artıq Üçüncü dünya müharibəsinin başlanğıcı olacaq. Bu halda Rusiya artıq özünü bütün beynəlxalq qanunlardan kənarda qoyacaq”, - deyə Ali Radanın milli təhlükəsizlik və müdafiə məsələləri üzrə komitəsinin üzvü bildirib.
Putinin şok planı: 50 gün ərzində bunu edəcək
“Reuters” agentliyi Rusiya tərəfindən dəstəklənən və Dəməşq tərəfində vuruşan hərbi ittifaqdakı yüksək vəzifəli məmura istinadən Moskvanın Hələb planını açıqlayıb. Mənbə bildirib ki, Suriya ordusu və müttəfiqlər ABŞ-ın yeni seçilən prezidenti Donald Trampın andiçməsinə qədər – 2017-ci il yanvarın 20-nə kimi Hələbin bütün şərq hissəsinin müxalifət qüvvələrindən almaq istəyir.
Adının anonim qalmasını istəyən məmurun sözlərinə görə, Hələbdə hərbi kampaniyanın növbəti mərhələsi daha mürəkkəb ola bilər. Bu onunla izah edilir ki, ordu və müttəfiqlər hazırda şəhərin ən sıx məskunlaşmış rayonlarını tutmağa çalışır. Müxalifət qüvvələri son bir neçə gün ərzində Hələbin şərqinin üçdə birini itiriblər və daha bir neçə min sığınacaqdan məhrum olub.
Qırğızıstan prezidenti Almazbek Atambayev 2016-cı ilin nəticələri ilə bağlı keçirilən mətbuat konfransında bir il sonra postunu tərk edəcəyini ölkədə hakimiyyət dəyişikliyi baş verəcəyini bildirib. Atambayev qeyd edib ki, ölkədə 2020-ci ilə kimi iki güclü partiyanın formalaşmasını istəyir.
Atambayev həmçinin Rusiya hərbi bazasının ölkədən çıxarılacağını deyib. O, qeyd edib ki, müqavilənin vaxtı başa çatandan sonra Rusiya hərbi bazası Qırğızıstandan çıxarılacaq: “Bəlkə də bu, kiminsə xoşuna gəlməyəcək. Lakin mən Rusiya prezidentinə fikrimiz çatdırdım, o məni anladı”.
Qeyd edək ki, Qırğızıstanda Rusiya hərbi bazası 4 obyektdən ibarətdir. 2009-cu ildə hərbi bazanın müddəti 49 illiyə uzadılıb.
Ömər Dağlı,
PUBLİKA.AZ & VƏTƏNSEVƏRLƏR
MUSİQİ İZLƏMƏK VƏ DİNLƏMƏK ÜÇÜN BURA DAXİL OLUN :
MUSİQİ - MÜZİK - MUSIC: Arif Babayev - AzTv "Musiqi Xəzinəsi" verilişində ...
KONFİÇYÜS :
- Həyat iztirab və kədər versə sükunəti musiqidə axtarın. Musiqi göylə torpaq arasında bir ahəngdir.
Bağlılıq musiqinin təməlidir, sevinc və məmnuniyyət isə musiqinin məmurlarıdır.
Düzgünlük musiqinin cövhəridir. Ciddilik, hörmət və nəzakət musiqinin sistemləridir.
Bir ölkənin doğru idarə olunub, olunmadığını, əxlaq baxımından ucalıb, ucalmadığını anlamaqmı istəyirsiniz?
O ölkənin musiqisini dinləyin. Bir cəmiyyətin musiqisi pozuldumu, o cəmiyyətdə bir çox şey pozulmuş deməkdir.
HƏQİQƏTƏN MUSİQİ İNSANLARIN UNİVERSAL DİLİDİR.
