BƏS HANI ERMƏNİSTANA QARŞI SANKSİYALAR ?

Azərbaycan torpaqlarının işğalı ilə bağlı yaranmış real beynəlxalq mənzərə

1. Ermənistanın silahlı təcavüzü və işğalı ağır nəticələrə gətirib çıxarıb.
Azərbaycanın Dağlıq Qarabağ bölgəsi və 7 ətraf rayon daxil olmaqla, 20% ərazisi 25 ilə yaxındır ki, Ermənistanın işğalı altındadır. Ermənistanın məcburi miqrasiya və etnik təmizləmə siyasəti nəticəsində bir milyondan artıq Azərbaycan vətəndaşı qaçqın və məcburi köçkünə çevrilib və onların insan hüquqları ciddi şəkildə pozulub. Azərbaycanın işğal edilmiş ərazilərində sosial və iqtisadi infrastrukturu məhv edilib, bu da olduqca ağır sosial, iqtisadi və ekoloji itkilərlə müşayiət olunub. İşğal edilmiş ərazilərdəki mədəni və tarixi irsə vurulmuş zərəri pul ilə ölçmək qeyri-mümkündür.
İşğal nəticəsində Azərbaycana vurulmuş maddi zərərin miqdarı 431 milyard ABŞ dollarından çoxdur və bu məbləğ ilbəil artır. Münaqişənin vurduğu mənəvi zərəri isə hesablamaq qeyri-mümkündür və bir milyon səkkiz yüz əlli min azərbaycanlının gündəlik həyatında müşahidə olunur.

2. İşğal altında qalmış Sərsəng su anbarı cəbhəyanı rayonlar üçün ciddi təhlükə mənbəyidir.
Qeyd edilməlidir ki, Azərbaycanın cəbhəyanı rayonlarının (Ağcabədi, Ağdam, Bərdə, Goranbay, Tərtər, Yevlax) meliorasiya və irriqasiya şəbəkəsi 1976-cı ildə Tərtər çayı üzərində inşa edilmiş Sərsəng su anbarından qidalanırdı. Təəssüf ki, bu su anbarı 22 ildən artıqdır ki, işğal altındadır. 
Baxımsızlıq nəticəsində su anbarı ətrafındakı 6 rayonun torpaqları susuz qalmışdır. Bəzi ekspertlərin hesablamalarına görə Sovet İttifaqı dövründə inşa edilmiş anbarın dağılmasının ətraf ərazidə yaşayan 400 min mülki əhali üçün fəlakət xarakterli təhdid yaradacağı qaçılmazdır. Ermənistanın anbara nəzarət etməsi artıq böhrana səbəb olmuşdur, belə ki, qışda su buraxıldıqda ətraf rayonlarda yollar dağılır və yayda su kəsildikdə ətrafdakı əkin sahələri quruyur. Lakin Ermənistanın regionu işğal etməsi səbəbindən bu iqtisadi, humanitar, ekoloji və bioloji fəlakət təhlükəsi yalnız son vaxtlar gündəmə gəlmişdir.

3. Naxçıvanın blokada vəziyyətində yaşaması faktiki olaraq bölgənin inkişafının qarşısını alır
Naxçıvan Muxtar Respublikası 25 ildir ki, blokada şəraitində yaşayır və bu müddət ərzində bölgədə yaşayan 410 mindən artıq mülki əhali böyük əziyyətlərə düçar olmuş, təbii qaz və elektrik enerjisi çatışmazlığı əhalinin vəziyyətini daha da çətinləşdirmiş, bölgənin iqtisadi və sosial inkişafına ciddi neqativ təsir göstərmişdir. Təəssüflə qeyd etməliyəm ki, indiyədək blokada nəticəsində Naxçıvanda yaranmış vəziyyətə dair beynəlxalq sferada hər hansı bir müzakirə aparılmamış, Naxçıvana dair AŞPA və digər beynəlxalq təşkilatlarda hər hansı bir qətnamə qəbul edilməmişdir.

4. Krım və Dağlıq Qarabağın vəziyyəti bir-birindən kəskin fərqlənir
Bir çox ekspertlər Krım ilə Dağlıq Qarabağ arasında oxşarlıqların olduğunu vurğulayır. Buna baxmayaraq, bu iki münaqişə tarixi, siyasi və hüquqi baxımdan bir-birindən kəskin fərqlənir. Məsələn:
a. Bütün etnik qruplar, o cümlədən ruslar, ukraynalılar, Krım tatarları Krımdakı referendumda iştirak etdilər. Dağlıq Qarabağda ümumxalq səsverməsi adı altında keçiriləcək hər hansı gələcək səsvermədə yalnız işğal olunmuş ərazilərdə yaşayan ermənilər iştirak edəcək. Qeyd etmək lazımdır ki, bu ərazi zorla mono-etnik əraziyə çevrilmişdir. Azərbaycanlılar etnik təmizləməyə və məcburi miqrasiyaya məruz qaldığı üçün ermənilər bu gün Dağlıq Qarabağda yeganə etnik qrup təşkil edir.
b. Beynəlxalq hüquq nöqteyi-nəzərdən öz müqəddəratını təyinetmə hüququ müharibə aparan, ərazidə yaşayan digər xalqların nümayəndələrinə qarşı zorakılıq əməlləri, kütləvi qırğınlar və soyqırım cinayəti törədənlərə şamil edilmir və zorakılıq yolu ilə dövlətlərin ərazilərinin bölünməsi qanuni hesab edilə bilməz.

5. Azərbaycan Ukraynanın ərazi bütövlüyünü dəstəkləyir, lakin Ukrayna ilə eyni səviyyədə dəstək tələb edir
Azərbaycan Ukraynanın ərazi bütövlüyü, suverenliyi və sərhədlərinin toxunulmazlığını dəstəkləyir. Azərbaycan Nümayəndə heyəti martın 27-də BMT Baş Assambleyasında “Ukraynanın ərazi bütövlüyü”nə dair qətnaməni dəstəkləyərək, bu məsələdəki mövqeyini açıq nümayiş etdirdi.
Eyni zamanda, hesab edirəm ki, Dağlıq Qarabağ dondurulmuş münaqişə deyil, bütövlükdə Cənubi Qafqazda təhlükəli qeyri-sabitlik mənbəyidir və Ukrayna böhranı ilə eyni diqqətə layiqdir. Odur ki, beynəlxalq təşkilatlar və Avropa institutları öz qərarlarına hörmətlə yanaşmalı və qəbul etdikləri qərarları yerinə yetirməlidirlər.
Ermənistan təcavüzününnəticəsi olaraq blokadaya görə 410 min Naxçıvan əhalisi, Sərsəng su anbarının işğal altında olması səbəbindən ətraf 6 rayonun 400 min nəfər əhalisi və 20 ildən artıq müddətdə davam edən hərbi işğal səbəbi ilə 1 milyona qədər azərbaycanlı, ümumilikdə 1.850.000 nəfər Azərbaycan vətəndaşı insan hüquqlarından məhrum olmaqla, öz ölkəsində qaçqın kimi, mürəkkəb sosial-iqtisadi şəraitdə yaşayır.
Lakin beynəlxalq təşkilatlar hər vəchlə Ermənistanın müdafiəsində durur, ona havadarlıq edir, işğala son qoyulması istiqamətində heç bir real hərəkət etmək istəmirlər, yalnız qətnamələr qəbul etməklə kifayətlənirlər, ona qarşı heç bir sanksiyalar tətbiq etmirlər, bu beynəlxalq qurumlar işğala məruz qalmış Azərbaycanla işğalçı Ermənistan arasında nəinki heç bir fərq qoymur, hətta Ermənistanı daha demokratik ölkə kimi göstərməyə can atırlar.

6. Altı Şərq Tərəfdaşlığı ölkəsində
Şərq Tərəfdaşlığı proqramında, Belarusu nəzərə almasaq, 5 post-Sovet ölkəsi iştirak edir. Şərq Tərəfdaşlığının əsas məqsədi tərəfdaş ölkələrlə Aİ arasında daha sıx inteqrasiya əlaqələrinə nail olmaqdır. Lakin Tərəfdaşlığın əsas məqsədlərində Rusiya faktoru nəzərə alınmayıb.
Post-Sovet ölkələri ilə Rusiya arasında müxtəlif sahələrdə əlaqələr mövcuddur və ŞT ölkələrinin əksər ərazi problemlərinin həlli Rusiyadan asılıdır. Odur ki, Şərq Tərəfdaşlığı proqramında Rusiya faktorunun nəzərə alınmaması Şərq Tərəfdaşlığı ölkələrini Avropa İttifaqı ilə Rusiya arasında çətin seçim qarşısında qoyur.
Digər tərəfdən, ŞT ölkələri Qərb və Rusiya maraqlarının toqquşduğu geosiyasi məkandır. Aİ indiyə qədər Şərq Tərəfdaşlığı proqramında tərəfdaş ölkələrin qarşılaşacağı risklərin qarşısının alınmasına yönəlmiş mexanizm təklif etməyib. Ona görə də tərəfdaş ölkələr mövcud geosiyasi risklərdən sığortalanmayıblar.
Bu baxımdan Ukrayanada baş verən böhran geosiyasi böhrandır. Əgər Şərq Tərəfdaşlığı Proqramı tərəfdaş ölkələrinin ərazi problemlərini həll etmək gücündə deyilsə, əksinə bu ölkələr üçün yeni ərazi itkilərinə və digər məhrumiyyətlərə yol açırsa, deməli, bu Proqramın gələcəyi barədə ciddi düşünülməlidir.
Ümumiyyətlə uğursuz, gələcəyi ümidsiz və qaranlıq görünən Şərq Tərəfdaşlıq Proqramı və Avronest PA-nın taleyinə Avropa Parlamentinin seçkilərindən sonra yenidən baxılmalıdır.

7. Azərbaycan Aİ ilə ikitərəfli strateji əlaqələrdən yararlanır
Assosiasiya sazişi universal saziş deyil, Aİ-nin öz qonşuları ilə imzalayacağı ikitərəfli sazişdir. Sazişin şərtləri aidiyyəti tərəflər arasında danışıqlar nəticəsində formalaşdırılır. Azərbaycan Aİ ilə ikitərəfli strateji tərəfdaşlıqdan yararlanır və Aİ ilə Azərbaycan arasında bir ildən artıqdır ki, bu istiqamətdə danışıqlar aparılır.

8. Azərbaycan və Avropa İttifaqı enerji sahəsində əməkdaşlıq edir
"Şahdəniz" yatağından emal ediləcək qazın 2018-ci ildən Trans-Adriatik (ТАР) və Trans-Anadolu (ТАNАР) qaz kəmərləri vasitəsilə Avropaya nəql olunacağı gözlənilir. Bakı-Tbilisi-Ceyhan neft boru kəməri, Bakı-Tbilisi-Ərzurum qaz kəməri və Bakı-Tbilisi-Qars dəmiryolu layihələri Aİ ölkələrinin enerji təhlükəsizliyinin təmin edilməsinə xidmət edir.

9. Beynəlxalq təşkilatların mövqeyi birmənalı olsa da, Ermənistana qarşı heç bir sanksiya tətbiq edilmir
BMT Təhlükəsizlik Şurası 1993-cü ildə Azərbaycan ərazilərinin işğalına dair 4 qətnamə qəbul edib (Qətnamə 822, 853, 874 və 884), bu sənədlərdə işğalçı tərəfdən işğal edilmiş əraziləri qeyd-şərtsiz azad etmək tələb edilirdi. Azərbaycan ərazilərinin ermənilər tərəfindən işğalı həmçinin AŞPA, Avropa Parlamenti və digər beynəlxalq təşkilatlar tərəfindən pislənib.
Beynəlxalq təşkilatlar müxtəlif qətnamə və bəyanatlarla Azərbaycanın ərazi bütövlüyünü beynəlxalq səviyyədə tanınmış sərhədlər çərçivəsində tanıyır, lakin Ermənistana qarşı heç bir sanksiya tətbiq etmirlər.
Beynəlxalq ictimaiyyət Ermənistanın Azərbaycana qarşı təcavüzünü pisləməklə kifayətlənir və bu, beynəlxalq təşkilatların ikili standartlardan çıxış etdiyini göstərir.

10. Azərbaycan beynəlxalq təşkilatlarda ayrıseçkiliklə üzləşir.
Biz çox illərdir ki, Şərq Tərəfdaşlığı proqramında iştirak edirik. Biz 14 ildir ki, Avropa Şurasının üzvüyük. Lakin problemlərimizin həlli 20 ildir ayrıseçkiliklə üzləşdiyimiz beynəlxalq təşkilatlarda müvafiq qaydada dəstəklənmir. Rusiyanın Krımı özünə birləşdirməsindən sonra diplomatik danışıqlar və ona tətbiq edilən sanksiyalar fonunda Qərbin işğal edilmiş əraziləri, Dağlıq Qarabağ və ətraf rayonlarla bağlı ikili standartlar və riyakarlıq nümayiş etdirməsi özünü daha qabarıq şəkildə biruzə verir. Azərbaycanın bu rayonları 25 ilə yaxındır ki, beynəlxalq hüquq normaları pozulmaqla, Ermənistanın işğalı altındadır, lakin Aİ ərazi bütövlüyünün bu pozulmasına və bir milyon məcburi köçkünün əziyyət çəkməsinə etinasızlıqla yanaşır. Qanun qanundur və heç zaman müxtəlif ölkələr üçün fərqli şəkildə şərh edilməməlidir. Dünya Moskvaya diplomatik təzyiq göstərir, bəs hanı Ermənistana qarşı sanksiyalar? Beynəlxalq ictimaiyyət Ukrayna və onun ərazi bütövlüyünü dəstəkləyən bəyannamə və tədbirlər kimi, bu gün eyni dəstəyi Azərbaycana da təmin etməli, eyni zamanda BMT-nin Təhlükəsizlik Şurası, Avropa Parlamenti, Avropa Şurası tərəfindən qəbul edilmiş qətnamələrə hörmət etməlidir.
Hesab edirəm ki, Amerika və qərb dövlətlərinin, bütün beynəlxalq qurumlarının Ukraynaya verdikləri dəstəkdən Azərbaycan dərs götürməli, dünya birliyindən, xüsusilə Avropa İttifaqı, Avropa Şurası və ATƏT-dən Ermənistana sanksiyların tətbiqini və öz haqqını tələb etməlidir.
Onlar isə bunu etmək əvəzinə daim müxtəlif bəhanələrlə Azərbaycanın başını qarışdırmaqla məşğuldurlar. Beynəlxalq qurumlar isə Ermənistanı müdafiə etmək üçün insan hüquqları altında Azərbaycanın Avropa Şurasının Nazirlər Komitəsinə sədrlik edəcəyi dövrdə ölkəmizə qarşı geniş miqyaslı hücümlara hazlrlaşırlar. Bunun rüşeymləri artıq görünür.
Özünü azadlıq və vəhdət evi hesab edən Avropa Şurası dünya ictimaiyyətinə təsdiq etmək istəyir ki, onun əsas fəaliyyəti insan hüquqlarıdır. Araşdırdıqda görürsən ki, bu, AŞ-ya üzv olan 47 dövlətdən ancaq əsasən dörd ölkəyə şamil olunur :
- Rusiya, Ukrayna, Türkiyə, Azərbaycan.
Hazırki vəziyyətdə beynəlxalq təşkilatlar, o cümlədən, Avropa Şurası Ukraynanı bu siyahıdan silmişlər. Bundan əlavə, qeyd edilən güc mərkızləri onlar üçün xüsusi əhəmiyyət kəsb edən Türkiyəyə qarşı hücumlardan ehtiyatlanırlar.
Digər tıərəfdən, AŞPA aprelin 10-da Rusiyanı müvəqqəti səsvermə hüququndan məhrum etdi. Lakin 2 gün sonra çoxları hücum etməyə ölkə tapmadıqlarından məyus oldular. Belə ki, AŞPA-da insan hüquqları adı altında hücum obyektlərinin sayı minimuma enmiş oldu. Ona görə də Avropa Şurası öz iş dinamikasını pozmamaq üçün Azərbaycana hücum strategiyasına gizli start verməyə başlamışdır.
Hamıya bəllidir ki, beynəlxalq təşkilatların hər hansı bir ölkəyə, xüsusilə Azərbaycana hücum etmək üçün çoxdan bəlli olan iş mexanizmi vardır. Dünyanın güc dövlətləri tərəfindən maliyyələşən, onların sifarişlərini yerinə yetirən və qondarma, böhtanlı faktlarla beynəlxalq təşkilatlara istinad mənbəyi verən bir neçə beynəlxalq QHT: Amnesty International, Human Rights Watch, Avropa Sabitlik Təşəbbüsü, Freedom House və digər beynəlxalq təşkilatlar insan hüquqları və söz azadlığı ilə bağlı ölkəmizə qarşı fəaliyyətə başlayır. Hadisələr sonradan köhnə ssenari üzrə davam etdirilir: onlar eyni zamanda yerli QHT-ləri maliyyələşdirərək müxtəlif üsullarla öz istinadlarını daha da gücləndirirlər. Yeri gəlmişkən demək istərdim ki, Azərbaycanın bəzi QHT-ləri Avropa Şurasına üzv ölkələrin milli QHT-ləri arasında xarici donorlar vasitəsilə öz ölkəsinə əsassız böhtanlarla hücum etməkdə çempiondurlar.

Elxan Süleymanov
AVCİYA-nın prezidenti,
Şamaxının millət vəkili

DAĞLIQ QARABAĞI RUSİYAYA BİRLƏŞDİRİRLƏR ? YOXSA ...

Dünən gecə Rusiyanın Gümrüdə dislokasiya olunan 90 ədəd tank və zirehli texnikası Ermənistanın Gorus bölgəsinin Karaşen yaşayış məntəqəsinə gətirilib.

Bu barədə məlumatı “Axar.az”a Ukrayna Qarapapaq Türkləri Milli Şurasının (UQTMŞ) sədri Daşqın Gülməmmədov deyib. O, qeyd edib ki, Rusiya ordusuna məxsus tanklar Laçının bir addımlığındadır: “Artıq Rusiya Baş Qərargahı Azərbaycanın işğal edilmiş Dağlıq Qarabağ və ətraf rayonlarında yerləşən Ermənistan ekspedisiya korpusunu əlavə tank və zirehli texnika ilə gücləndirməyə başlayıb. Dünən axşam zirehli texnika, qoşqulu avtomobillərdə Gümrü-İrəvan-Artaşat-Sisian-Gorus avtomobil yolu vasitəsilə xüsusi maskalanmış vəziyyətdə işğal edilmiş Laçın rayonu yaxınlığına — Karaşen yaşayış məntəqəsinə gətirilib. Qoşqulu avtomobillərə yüklənmiş hərbi texnika maskalanmış olsa da peyk vasitəsilə müşahidə olunub. Onun sözlərinə görə, artıq İsrailin «Mossad» və ABŞ-ın Mərkəzi Kəşfiyyat İdarəsində bununla bağlı məlumat var: “Dünən gecə ABŞ Milli Təhlükəsizlik Agentliyi hərbi texnikanın köçürülməsini tam dəqiqliyi ilə müşahidə edib və peyk vasitəsilə videolentə alıb. Yaxın 2 gün ərzində isə Xankəndi-Ağcabədi və Ağdərə-Tərtər istiqamətindəki mövqelərə yaxın ərazilərdə yerləşdiriləcək. Çox güman ki, Dağlıq Qarabağın Rusiyaya birləşdirilməsinə başlanacağı təqdirdə, Tərtər-Yevlax istiqamətində genişmiqyaslı hücum imitasiya ediləcək”. Gülməmmədov bildirib ki, iki gün öncə isə Rusiya Baş Kəşfiyyat İdarəsinin (QRU) 3 generalı Xankəndiyə ezam olunub: “Bu məlumat artıq İrəvanda söz-söhbətə belə səbəb olub. Həmçinin, artıq Ermənistan televiziyaları bir həftədir ki, mütəmadi olaraq silahli qüvvələr barədə reportajlar hazırlayır və «Favorit» tipli HHM raketlərini reklam edirlər.

Seva

"20 YANVARA GÖRƏ QORBAÇOV HAAQA TRİBUNALINA VERİLMƏLİDİ"

Politoloq Tofiq Abbasov: "Nə qədər ki, Qorbaçov sağdır, onu ittiham etmək lazımdır"

Bir qrup rusiyalı deputatın SSRİ-nin eks prezidenti Mixail Qorbaçova qarşı cinayət işinin açılmasını tələb etməsi Azərbaycanın da 20 yanvar hadisələrinə görə onu məhkəməyə verə biləcəyi fikrini gündəmə gətirdi.

ANS PRESS-in məlumatına görə, Qorbaçovun məhkəməyə verilib ittiham edilməsi barədə politoloq Qabil Huseynli bunları bildirdi: 
”Qorbaçovun ən böyük günahı məhz 20 yanvar hadisələri, 9 aprel Gürcustanda baş verən,Vilnusda törədilən hadisələrdir. Günahsız insanların vəhşicəsinə qırdırılması Qorbaçovun əmrilə baş verib. Bu cinayətlərin içində ən böyüyü məhz 20 yanvar qırğınıdır. Orda ölənlərin sayı 165 nəfərdən çoxdur, yaralanlar isə 600 nəfəri keçib. Miqyasına, həyata keçirilmə formasına görə hec bir tutarlı səbəb gətirilmədən güya Azərbaycanda fundamental islamın qələbə cala biləcəyi ehtimalı oldugundan bunun qarşısını almaq zərurətindən Bakıya qoşun yeridildi. Bütün bunlar Qorbaçovun təşəbbüsü ilə SSRİ Ali Sovetinin fərmanı ilə həyata keçirildi. Qorbaçovun ən böyuk qunahlarından biri Bakıdakı qanlı yanvar hadisələridir. O, buna görə cavab verməlidir. Azərbaycan buna dəfələrlə təşəbbüs göstərib, amma təəssüflər olsun ki, bu məsələyə nail ola bilməyib. SSRİ-nin dağılması ilə bağlı onu günahlandırmaq cəfəngiyatdır. Azərbaycan Qorbaçovu və onun o dövr yanında olan komandasını beynəlxalq Haaqa tribunalına verməlidir. Haaqa tribunalı bu məsələni araşdırmalı, onları muhakimə etməlidir”.

Politoloq Tofiq Abbasovun fikri isə belə oldu: ”20 yanvar hadisələri sovet rejiminin Azərbaycan xalqına qarşı duşünülmüş bir təxribatıdır. Bu, qanlı təxribat idi, bu, cinayətkar bir hadisə idi. Bunun arxasında Kreml rəsmləri ilə erməni diqtəçi qruplarının fəalları dururdu. Bizim Azərbaycan üçün burda qaranlıq bir məqam qalmayıb. Nə qədər ki, həmin dövrdə ölkəyə rəhbərlik edən və 20 yanvar hadisələrinə birbaşa cavabdehlik daşıyan Qorbaçov sağdır, onu ittiham etmək lazımdır. Gunahsız insanları öldutdürən Qorbaçovla yanaşi Bakatin və o dövr hakimiyyətdə olan digər səlahiyyətli şəxslər məhkəmə qarşısında cəzalandırılmalıdır. Bu məsələyə nöqtə qoyulmayib. Cinayət baş veribsə, cəzası da olmalıdı".

Xatırladaq ki, Rusiya Dövlət Dumasının bir qrup deputatı Sovet İttifaqının dağılması dövründə baş verən hadisələri yoxlamaq məqsədilə ölkənin Baş prokuroru Yuri Çaykanın adına sorğu ilə müraciət edib. Müraciətdə SSRİ-də keçirilən referendum zamanı dövlətin vahid şəkildə idarə olunması dəstəklənsə də o dövrdə hakimiyyətin atdığı qeyri-qanuni addımlar ölkənin dağılmasına səbəb olduğu bildirilib.

 İdrak Camalbəyli 

RUS GENERALİTETİNİN BAKI SƏFƏRİNDƏ İLGİNC DETALLAR

Moskva Avropa Şurasında müzakirələr gedən vaxtda rəsmi Bakıdan dəstək umub; Üzeyir Cəfərov: “Nəcməddin Sadıqovun rus generalına medal verməsi xəyanətə bərabərdir”

“Rusiya Silahlı Qüvvələrinin Baş Qərargah rəisi, ordu generalı Valeri Gerasimovun Azərbaycana səfəri əslində formal xarakter daşıyırdı. Səfərin arxasında qeyri-rəsmi razılaşmalar dayanır. O, Bakıda Azərbaycan siyasi rəhbərliyinin dəstəyini almaq niyyəti güdüb. Çünki hazırda Avropa Şurasında Rusiya ilə bağlı gərgin müzakirələr gedir”. 

Bu sözləri ehtiyatda olan polkovnik-leytenant Üzeyir Cəfərov qəzetimizə açıqlamasında səfərin nəticələrini şərh edərkən deyib. Onun sözlərinə görə, yaranmış vəziyyətdə Rusiya Azərbaycandan dəstək gözləyir: “Ona görə də rus generalitetinin Bakı səfərinin başqa məqsədi olmayıb və ölkəmiz üçün müsbət mənada heç bir nəticə əldə olunmayıb. Gerasimovun rəhbərlik etdiyi nümayəndə heyətinin Bakı səfəri Ukraynanın parçalanması ərəfəsinə təsadüf edir və qonşu dövlət üçün xüsusi əhəmiyyəti var”. 

Hərbi ekspert səfərin yekununda rus generalına medal verilməsini də Moskvaya jest kimi qiymətləndirir. Onun fikrincə, V.Gerasimov Bakı səfərində Azərbaycana bir kəlmə də dəstəyini ifadə etməyib. Bununla belə, onun döşünə orden taxılıb: “Nəcməddin Sadıqov rus generalına hərbi əməkdaşlıq sahəsində xidmətlərinə görə medal verdi. Hərbi sahədə əməkdaşlıq olması normaldır.

Buna görə başqa dövlətin generalına medal vermirlər. Özü də Valeri Gerasimov torpaqlarımızın işğalında maraqlı olan hərbçidir. Bu general ermənilərlə hərbi müttəfiqlik müqaviləsi imzalayıb, Ermənistanda hərbi baza saxlayır. Üstəlik, səfəri zamanı Azərbaycanı dəstəkləyən mövqe ortaya qoymadı. Bu halda generala medal vermək nə dərəcədə doğru qərardır?"

Ekspertin sözlərinə görə, bu tədbirdə Azərbaycanın xeyrinə heç bir nəticə əldə olunmayıb: “Ermənistan tərəfi tədbirə gəlməkdən imtina etdi. Çünki görüş formal xarakter daşıyırdı. Bizimkilər isə bu tədbirdə rus generalına medal verirlər. Rus generalına medal vermək xəyanətə bərabərdir. Məlum məsələdir ki, torpaqlarımızın işğalda qalmasında günahkar Rusiyadır”. 

Üzeyir Cəfərov Azərbaycan Silahlı Qüvvələrinin Baş Qərargah rəisi, general-polkovnik Nəcməddin Sadıqovun rəhbərliyi ilə Baş Qərargahın zabitlərindən ibarət qrupun cəbhə bölgəsinə getməsinə də münasibət bildirdi. O, bu addımı özbaşınalıq kimi qiymətləndirdi: “Artıq neçənci dəfədir bu məsələyə toxunuram. Prezident ciddi tədbir görməlidir. Hər dəfə ölkə başçısı xaricə gedəndə Nəcməddin Sadıqov cəbhəyə yollanır. Bu, kobud səhvdir. 
Bundan əvvəl də müdafiə naziri Zakir Həsənov, general-leytenant Rövşən Əkbərov və Nəcməddin Sadıqov ön səddə çıxmışdılar. 

Azərbaycan dövlətini çətin duruma qoyurlar. İndi də prezidentlə müdafiə naziri İrandadır. Nəcməddin Sadıqov dəstəsi ilə cəbhəyə gedib. Başa düşürəm, yanında rabitəsi var. Ancaq Ermənistan Qərb istiqamətindən hərbi müdaxilə edə bilər. Elə bil bu adam Azərbaycanın qəsdinə durub. Ümumi hərbi qaydaya görə, qərar qəbul etmək, döyüş hazırlığı vəziyyətinə gətirmək mexanizmi var. Prezident müdafiə nazirinə, nazir baş qərargah rəisinə tapşırıq verir. Ancaq onların heç biri ölkədə deyil və Nəcməddin Sadıqov dəstəsi ilə cəbhəyə gedib". 

Qeyd edək ki, görüşdə general-polkovnik N.Sadıqov Ermənistanın Azərbaycana qarşı hərbi təcavüzü nəticəsində ərazilərimizin işğal olunması faktını, bunun nəticəsində doğma ocaqlarından didərgin salınmış bir milyonadək qaçqın və məcburi köçkün soydaşlarımızın mövcudluğu problemini qonaqların diqqətinə çatdırıb və zəbt olunan ərazilərin mütləq azad ediləcəyinə əminliyini vurğulayıb.

E.Salamoğlu
musavat.com

UKRAYNADAN RUSİYAYA AĞIR ZƏRBƏ - “ŞAYTAN” SATILIR

Ukrayna hökuməti nüvə başlığı daşıya biləcək “Şaytan” raketlərinin hazırlanma sxemlərini Türkiyə və digər üçüncü ölkələrə satmaq üçün hərəkətə keçib.  

 “Axar.az” türkiyə mətbuatına istinadən xəbər verir ki, Ukrayna Rusiyadan qisas almaq məqsədilə öz ərazisində istehsal edilən Rusiyaya məxsus P-36M2 “Voyevodo” raketlərinin texniki hazırlıq sxemlərini Türkiyə daxil başqa üçüncü ölkələrə satmaq üçün bəzi fəaliyyətlər göstərməkdədir. Qeyd edək ki, mövzuyla bağlı Rusiya Xarici İşlər Nazirliyi də “Ukraynaya ciddi xəbərdarlıq” başlığı altında bir açıqlama yayaraq Kiyev hökumətini ittiham edib.   

NATO-nun “Şaytan” adlandırdığı sözügedən P-36M2 raketini Rusiya nüvə hücumundan müdafiə sisteminin ən önəmli hissələrindən biri olduğunu hesab edir. Çünki bir sıra özəlliklərə malik olan bu raket ABŞ və NATO-nun qurmağı planlaşdırdığı nüvə raketlərindən müdafiə sisteminə qarşı ciddi müqavimət göstərə biləcək bir silah olaraq qiymətləndirilir. 

axar.az

ABŞ: “PUTİN AZƏRBAYCANA HƏRBİ MÜDAXİLƏ EDƏCƏK"

“Putin Azərbaycan və Gürcüstanda Rusiya meyilli müxalifət qüvvələri maliyyələşdirir”.  

 “Axar.az” “Val Strit jurnal”a (“The Wall Street Journal”) istinadən xəbər verir ki, bu açıqlama ilə siyasi ekspert Svante Kornelle çıxış edib.   O, Rusiyanın Qafqaza təsirinin həddən artıq gücləndiyini bildirib:   “Moskva Ermənistan üzərində nəzarətini artırıb. 2013-cü ilin sentyabrında Ermənistanı Gömrük İttifaqına zorla gətirməyə razı salıb. İndi isə növbə digər ölkələrindir. 

Putin Azərbaycan və Gürcüstanda Rusiya meyilli müxalifət qüvvələri, etnik azlıqları maliyyələşdirir. Bu ölkələrin rəhbərləri isə Qərbin Krım böhranına göstərdiyi münasibətdən heç də razı deyillər”.    

Ekspert bu ilin yayına qədər regionda vəziyyətin şiddətlənə biləcəyini deyib:   “Ermənistandakı hərbi bazaları hesabına rəsmi Moskva Azərbaycana hərbi təcavüz etmək imkanına sahibdir və bunu da edəcək. O, iki ölkə arasında münasibətləri şiddətləndirəndən sonra Dağlıq Qarabağı yenidən savaş mərkəzinə çevirməyə çalışacaq. Rusiya Gürcüstandan özünün Ermənistandakı hərbi bazaları üçün tranzit rolunu oynamasını tələb edəndə Qərb nə edəcək? Əgər yoxlanılmamış və kaprizli Tiflis ABŞ-ın dəstəyini üzərində hiss eləməsə, o zaman... Həmçinin bu ilin yayında Gürcüstan Avropa İttifaqına assosiativ üzvlüyə qəbul olacaq ki, bu da Rusiyanın təzyiqinin görünməmiş həddə çatacağına səbəb olacaq”.  

axar.az

NƏCMƏDDİN SADIKOVDAN MÜHARİBƏ MESAJI

“Dağlıq Qarabağ münaqişəsinin təşkilatçıları bilməlidirlər ki, Azərbaycan xalqı mövcud durumla heç vaxt barışmayacaq”

Azərbaycan xalqının səbri tükənməz deyil. Dağlıq Qarabağ münaqişəsinin təşkilatçıları reallıqları dərk etməlidirlər və bilməlidir ki, Azərbaycan xalqı mövcud durumla heç vaxt barışmayacaq. Azərbaycan beynəlxalq hüquq çərçivəsində ərazi bütövlüyünü bərpa etmək üçün bütün imkanlardan yararlanacaq. 

APA-nın məlumatına görə, bunu Bakıda MDB Baş Qərargah Rəisləri Komitəsinin iclasında Azərbaycan müdafiə nazirinin I müavini, Silahlı Qüvvələrin Baş Qərargah rəisi, general-polkovnik Nəcməddin Sadıkov deyib.

Azərbaycanın hərbi büdcəsinin ilbəil artdığını və bu tendensiyanın davam edəcəyini söyləyən N.Sadıkov bununla yanaşı ölkəmizin Qarabağ münaqişəsinin sülh yolu ilə həllinə tərəfdar olduğunu qeyd edib.

“Hesab edirik ki, problemin dinc yolu ilə nizamlanması üçün şanslar və ümidlər qalmaqdadır. Ermənistanın təcavüzkar qüvvələri BMT Təhlükəsizlik Şurasının qətnamələrinə tabe olmalı və Azərbaycan ərazilərini tərk etməlidir. Beynəlxalq hüquq hamı üçün eyni olmalıdır. İkili standartlara yer verilməməlidir və heç kim müstəsna hüquqa malik olmamalıdır”, - deyə o vurğulayıb.

N.Sadıkov qeyd edib ki, beynəlxalq təşkilatların, o cümlədən MDB-nin qətiyyətsizliyi Ermənistanın uzun müddət ərzində təcavüzü davam etdirmək üçün şərait yaradır.

“Bu gün Ermənistanın yürütdüyü siyasət onu bölgədəki bütün iqtisadi layihələrdən təcrid edib. Ermənistan digərlər ölkələrdən daha çox qazana bilərdi”, - deyə o bildirib.

N.Sadıkov həmçinin qeyd edib ki, Azərbaycan MDB-dəki fəaliyyətinə böyük önəm verir.

teleqraf.com