Xocalı soyqırımının 20-ci ildönümü ilə bağlı Milli Məclisin xüsusi iclası keçiriləcək

Xüsusi iclasda soyqırımın beynəlxalq səviyyədə tanıtdırılması ilə əlaqədar müzakirələr aparılacaq
 Xocalı soyqırımının 20-ci ildönümü ilə bağlı Milli Məclisin (MM) xüsusi iclası keçiriləcək. APA-nın xəbərinə görə, bunu MM sədrinin müavini Bahar Muradova bildirib. İclasın keçiriləcəyi tarixi açıqlamayan B. Muradova bununla bağlı dəqiqləşmə aparıldığını söyləyib. Onun sözlərinə görə, xüsusi iclasda Xocalı soyqırımı ilə bağlı bir sıra məsələlər, o cümlədən soyqırımın beynəlxalq səviyyədə tanıtdırılması ilə əlaqədar müzakirələr aparılacaq, üvafiq qərarlar qəbul ediləcək.

“XOCALI HADİSƏSİNDƏ ZƏRƏR ÇƏKƏNLƏRƏ TƏZMİNAT VERİLMƏSİNİ TƏLƏB EDƏCƏYİK”

Taksim mitinqinin təşkilatçıları iyunda Ermənistan sərhədində etiraz yürüşü keçirməyi planlaşdırırlar .

  Fevralın 26-da İstanbulun Taksim meydanında keçirilməsi planlaşdırılan yürüşə dair hazırlıq işləri davam etdirilir. Bu barədə “Yeni Müsavat”a məlumatı yürüşün əsas təşkilatçısı sayılan Türk Dünyası Kültür və İnsan Haqları Dərnəyinin İstanbul təmsilçisi Hanifi Çakır məlumat verdi. H.Çakir bildirdi ki, artıq yürüşün şüarları hazırlanıb: “Qarşıdakı günlərdə mitinqin təşkilinə kömək edən dərnək, qrup və təşkilatlarla yenidən bir araya gələcəyik. Yürüşün proqramını hazırlayırıq. Yürüş zamanı “Xocalıya ədalət”, “Qarabağ Azərbaycana qaytarılsın!” şüarları səsləndiriləcək.

 H.Çakır bildirdi ki, yürüş zamanı Xocalı soyqırımı zamanı zərər çəkən insanlara təzminat ödənməsini tələb edəcəklər: “Biz Ermənistanı dövlət kimi tanımırıq. Təzminatı da Ermənistanı dövlət kimi tanıyan ölkələrin hökumətlərindən tələb edəcəyik”.
H.Çakır bildirdi ki, onların bu tələbi yerinə yetirilməsə, iyun ayında Türkiyənin Ermənistanla sərhədində etiraz yürüşü təşkil edəcəklər.

Leyla İLQAR

Obama Ermənistana yardımı azaltmağı, Türkiyəyə isə artırmağı təklif edib

Barak Obama büdcə ilə bağlı təkliflərində belə fikir səsləndirib

 ABŞ prezidenti Barak Obama Konqresdə büdcə ilə bağlı müraciətində Ermənistana göstərilən iqtisadi yardımı 19 faiz azaltmağı təklif edib. ANS PRESS-in erməni mətbuatına istinadla verdiyi məlumata görə, bu barədə Amerika Ermənistan Milli Komitəsi (ANKA) informasiya yayıb. 

  Bununla bərabər, Obama admnistrasiyası Türkiyənin güclü qlobal tərəfdaş kimi rolunun artmaqda davam etməsi ilə bağlı bu ölkədə beynəlxalq hərbi təhsil proqramının həyata keçirilməsi üçün əlavə 3,6 milyon dollar ayırmağı təklif edib.

  İlkin olaraq Barak Obama Ermənistana yardımların 32 faiz azaldılmasını təklif edib. Konqres Ermənistana 40 milyon dollar yardım ayırmağı nəzərdə tutsa da, o 27,219 mln dollar tövsiyə edib. Bu, təklif etdikləri rəqəmdən 12,8 milyon dollar azdır. 

  Bu məbləğə daha əvvəl təsdiqlənmiş narkotik qaçaqmalçılığı ilə mübarizə və hüquq-mühafizə sisteminin inkişafına ayrılan 2,824, səhiyyəyə dair qlobal proqramların gerçəkləşməsinə ayrılan 2,5 mln dolları əlavə etdikdə Ermənistana ayrılan yardımın məbləği 19 faiz azalmış olur.



Kəmalə Məmmədova

Spilberq qondarma erməni soyqırımı haqqında film çəkəcək

Məşhur rejissor bununla bağlı ermənilərlə danışıqlara start verib

 Oskar mükafatı laureatı, məşhur rejissor Stiven Spilberq qondarma erməni soyqırımı haqqında film çəkə bilər. ANS PRESS-in Türkiyə mətbuatına istinadən verdiyi məlumata görə, rejissor bunun üçün Erməni Beynəlxalq Kino Mərkəzinin nümayəndələri ilə danışıqlara başlayıb. 

  Ermənilər 1915-ci ildə baş verdiyi iddia edilən qondarma soyqırım haqqında filmi 2015-ci ilədək ekranlara çıxarmaq fikrindədirlər. Xatırıladaq ki, rejissor Stiven Spilberq dünyaca məşhur “Şindlerin siyahısı” filmi ilə tanınıb. Onun lentə aldığı film “bütün dövrlərin ən yaxşı filmləri” sırasında yer alıb. Prakatdan 300 milyon dollar gəlir əldə edən film Oskar, Qızıl Qlobus, BAFTA və Qremmi kimi mükafatlara sahib çıxıb.



Azad Əliyev

Qarabağ Fondu ABŞ-ın 50 dövlət məktəbində Azərbaycan mədəniyyətini təbliğ edəcək

"Ailəni Məktəbə Cəlb Et Həftəsi"


 Qarabağ Fondu 13 fevral 2012-ci il tarixində ABŞ-da Virciniya ştatının Longfellow adlı orta məktəbinin 150-yə yaxın tələbə, valideyn və müəllimləri üçün Mədəniyyət Bayramı təşkil etdi. Fonddan ANS PRESS-ə verilən məlumata görə, bu tədbirin iştirakçıları Azərbaycan mədəniyyəti ilə tanışlıq imkanı əldə etdilər. Longfellow məktəbində təşkil olunmuş Mədəniyyət Bayramı zamanı Qarabağ Fondunun məktəbin Valideyn və Müəllim Birliyi üçün əldə etdiyi “Ailəni Məktəbə Cəlb Et Həftəsi” layihəsinin və Azərbaycan mədəniyyətinin təqdimatı tədbir iştirakçılarının böyük marağına səbəb oldu.

  Qarabağ Fondu bu layihəni ABŞ-ın AXA Fondundan aldığı qrant çərçivəsində həyata keçirir. Tədbir layihəni dəstəkləmiş AXA Fondunun nümayəndəsinin açılış nitqi ilə başladı. Daha sonra Longfellow orta məktəbində “Ailəni Məktəbə Cəlb Et Həftəsi” layihəsinin icrası üçün vəsait əldə etmiş Qarabağ Fondunun icraçı direktoru Diana Altman layihənin əhəmiyyətini vurğuladı. Qeyd olundu ki, Longfellow orta məktəbi layihə üçün qrant əldə etməyə görə müraciət etmiş 233 məktəb içərisindən seçilmiş 45 məktəbdən biridir. Məktəbin direktoru iştirakçılara müraciət edib bildirdi ki, məktəbdə 96 ölkədən nümayəndələr təmsil olunur və Valideyn Müəllim Birlikləri ailələri məktəbə cəlb etməli və məktəb və ailə arasında olan əlaqələri gücləndirməlidir.

  Təqdimatlardan sonra iştirakçılara Azərbaycan mədəniyyəti haqqında vəsait və müxtəlif milli geyimlər nümayiş etdirildi. Qarabağ Fondunun könüllü rəqqasları Azərbaycan rəqslərini nümayiş etdirdilər.

  Qeyd etmək lazımdır ki, qrantın icrasının növbəti mərhələsində Qarabağ Fondu Longfellow məktəbi üçün veb səhifə əsaslı Azərbaycan Mədəniyyət Mərkəzi yaradacaq. Mərkəz məktəb icması və yerli sakinlər üçün nəzərdə tutulmuşdur və mərkəzdə insanlar üçün çoxlu proqram və müxtəlif resurslar təqdim olunacaq. Mərkəz məktəbə və insanlara imkan yaradacaq ki, müxtəlif mədəniyyət və insanları birləşdirən Qarabağ Fondu kimi təşkilatların fəaliyyəti ilə tanış olsunlar.

  Qarabağ Fondu “Ailəni Məktəbə Cəlb Et Həftəsi” layihəsinin icrasını digər ABŞ-ın 50 dövlət məktəblərində həyata keçirməyi planlaşdırır. Fond ABŞ-ın məktəb direktorları üçün Azərbaycan və Qafqaz mədəniyyəti haqqında vəsaitlərin məktəb proqramına daxil etmələri haqqında təkliflər hazırlayır.

  Qeyd edək ki, Qarabağ Fondu ABŞ-da yaradılmış və mərkəzi ofisi Vaşinqton şəhərində yerləşən qeyri hökumət təşkilatıdır. Bu təşkilat ABŞ-da QHT-lərə verilən yüksək 501 (C) 3 statusuna sahibdir. Fondun əsas məqsədi Azərbaycan, onun Qarabağ bölgəsi və bütünlükdə Qafqazı amerikalılara tanıtmaq, Azərbaycan mədəniyyəti və musiqisini Amerikada tərənnüm və təbliğ etməkdən ibarətdir. Buna nail olmaq üçün Qarabağ Fondu ABŞ-da müxtəlif sərgi, ictimai proqram, forum və mübadilə proqramlarının həyata keçirir.


Zülfiyyə Qurbanova